കാസനോവയുടെ പ്രണയതീരങ്ങള്‍ 
ഇഷ്ടസുഗന്ധങ്ങള്‍ തേടി രാജ്യങ്ങളില്‍ നിന്ന് രാജ്യങ്ങളിലേക്ക് പറക്കുന്ന ബിസിനസ്മാന്‍-കാസനോവ. ഇന്റര്‍നാഷണല്‍ ലെവലിലുള്ള പൂക്കച്ചവടം പ്രധാന ബിസിനസ്സായതിനാല്‍ അദ്ദേഹം ഓരോ ആഴ്ചയും ഓരോ രാജ്യങ്ങളിലായിരിക്കും. റോഷന്‍ ആന്‍ഡ്രൂസ്, ബോബി സഞ്ജയ് ടീമിന്റെ തിരക്കഥയില്‍ സംവിധാനം ചെയ്യുന്ന 'കാസനോവ' ജീവിതം ആഘോഷമാക്കിയ ഒരു ബിസിനസ്സുകാരന്റെ കഥ വളരെ സ്റ്റൈലിഷായി സ്‌ക്രീനിലെത്തിക്കുകയാണ്. മോഹന്‍ലാല്‍ കേന്ദ്രകഥാപാത്രത്തെ അവതരിപ്പിക്കുന്ന ചിത്രത്തില്‍ ശ്രേയാശരണ്‍, ലക്ഷ്മിറായ്, റോമ, സഞ്ജന എന്നിവരാണ് നായികമാര്‍. ജഗതിശ്രീകുമാര്‍, ലാലു അലക്‌സ്, ശങ്കര്‍, റിയാസ് ഖാന്‍, അഭിലാഷ്, ഷംസി, അര്‍ജുന്‍, വിക്രം, രത്‌നം, നോവകൃഷ്ണന്‍, ഡിംപിള്‍ തുടങ്ങിയവരാണ് മറ്റ് താരങ്ങള്‍.
കാസനോവ ഏതു രാജ്യത്തിലാണെങ്കിലും അവിടെയൊക്കെ സ്ത്രീ സുഹൃത്തുക്കളുമുണ്ടാകും. എല്ലാ പുരുഷന്മാരും സൗന്ദര്യാരാധകരാണെന്നാണ് കാസനോവയുടെ പക്ഷം. അതിനാല്‍ അദ്ദേഹം എല്ലാ സ്ത്രീകളുടെയും ഉറ്റസുഹൃത്താവുന്നു. നൂറ്റാണ്ടുകള്‍ക്കുമുമ്പ് ഇറ്റലിയില്‍ ജീവിച്ചിരുന്ന കാസനോവയ്ക്ക് 122 സ്ത്രീ സുഹൃത്തുക്കളുണ്ടായിരുന്നു. ആ കാസനവോയുടെ പ്രകടനത്തെ മറികടക്കാന്‍ തന്റെ സ്ത്രീ സൗഹൃദങ്ങളിലൂടെ അഭിനവ കാസനോവയ്ക്ക് കഴിയുന്നു.
വിവിധ രാജ്യങ്ങളിലെ പുഷ്പവിപണികളിലെത്തുന്ന പൂക്കളുടെ നിറങ്ങളിലെ വ്യത്യസ്തതയും സുഗന്ധവുമാണ് കാസനോവയെ പൂക്കച്ചവടത്തിലേക്ക് ആകര്‍ഷിച്ചത്. കാമുകഹൃദയമുള്ള തനിക്ക് ഏറ്റവും അനുയോജ്യമായ ബിസിനസായിട്ടാണ് പൂക്കച്ചവടത്തെ കാസനോവ കാണുന്നത്. പല രാജ്യങ്ങളിലേക്കുള്ള പറക്കലിനിടയില്‍ അയാളുടെ ജീവിതവും വഴിമാറുന്നു. പ്രണയതീരങ്ങളായി കരുതിയ സൗഹൃദങ്ങളില്‍ നിന്നൊക്കെ പലതും കാസനോവയ്ക്ക് അഭിമുഖീകരിക്കേണ്ടിവരുന്നു. ആക്ഷനും സൗഹൃദനിമിഷങ്ങളുമെല്ലാം കോര്‍ത്തിണക്കി റോഷന്‍ ആന്‍ഡ്രൂസ് വെള്ളിത്തിരയിലെത്തിക്കുന്ന ചിത്രം കാസനോവയ്ക്ക് ബിസിനസ്മാന്‍ എന്നതിനപ്പുറം കുറേ ജീവിതമുഖങ്ങളുണ്ടായിരുന്നുവെന്ന് പറയുകയാണ്. ദുബായ്, ബാങ്കോക്ക് എന്നിവിടങ്ങള്‍ പ്രധാന ലൊക്കേഷനുകളാക്കി ചിത്രീകരിച്ച ചിത്രം കോണ്‍ഫിഡന്റ് ഗ്രൂപ്പിന്റെ ബാനറില്‍ സി.ജെ. റോയ്‌യാണ് നിര്‍മ്മിക്കുന്നത്. ചിത്രം ആശിര്‍വാദ് സിനിമാസ് ക്രിസ്മസ് റിലീസായി തിയേറ്ററുകളിലെത്തിക്കും.
എന്റെ സ്വപ്‌നമാണ് കാസനോവ-റോഷന്‍ ആന്‍ഡ്രൂസ്
കാസനോവ എന്റെ ആദ്യത്തെ ആക്ഷന്‍ ത്രില്ലറാണ്. റൊമാന്റിക് ആക്ഷന്‍ ത്രില്ലര്‍ എന്നു പറയാം. എന്റെ ആദ്യ സിനിമ ഉദയനാണ് താരം ഹ്യൂമറിനായിരുന്നു പ്രാധാന്യം നല്‍കിയത്. രണ്ടാമത്തെ സിനിമ നോട്ട്ബുക്ക് ടീനേജിനെയാണ് ഫോക്കസ് ചെയ്തത്. ഇവിടം സ്വര്‍ഗ്ഗമാണ് ഒരു റിയലിസ്റ്റിക് സിനിമയായിരുന്നു. കാസനോവ എന്റെ സ്വപ്‌നമാണ്. ഈ ചിത്രത്തിനുവേണ്ടി കളര്‍ടോണ്‍, ദൃശ്യങ്ങള്‍ എന്നിവയിലൂടെ പുതിയ പാറ്റേണ്‍ കൊണ്ടുവരാന്‍ ശ്രമം നടത്തിയിട്ടുണ്ട്. ഒരുപാട് പ്രതിസന്ധികള്‍ തരണം ചെയ്താണ് ഇപ്പോള്‍ കാസനോവ പൂര്‍ത്തിയാകുന്നത്. കഴിഞ്ഞ വര്‍ഷം സപ്തംബര്‍ 27ന് ചിത്രീകരണം തുടങ്ങിയ ചിത്രം വിവിധ ഷെഡ്യൂളുകളിലായി 84 ദിവസമാണ് ഷൂട്ട് ചെയ്തത്. ഇനി ഏതാനും ദിവസങ്ങള്‍ കൊണ്ട് ചിത്രം പൂര്‍ത്തിയാകും. 4 പാട്ടുകള്‍, 17 ഫൈറ്റ്, 108 സീന്‍ ഉള്‍പ്പെടെയാണ് 84 ദിവസംകൊണ്ട് ദുബായ്, ബാങ്കോക്ക് എന്നിവിടങ്ങളില്‍ പൂര്‍ത്തിയാക്കിയത്.
കാസനോവ വിഷ്വല്‍ ട്രീറ്റ് -മോഹന്‍ലാല്‍
''നമുക്ക് ലഭിക്കുന്ന കഥാപാത്രങ്ങള്‍ വിഭിന്നമായ വഴികളിലൂടെ സഞ്ചരിക്കുന്നത് കാണുമ്പോള്‍ വലിയ സന്തോഷം തോന്നാറുണ്ട്. കാസനോവയിലൂടെയും ആ സന്തോഷം ഞാന്‍ അനുഭവിക്കുന്നു. ആക്ഷന്‍ സീക്വന്‍സുകള്‍, ഗാനങ്ങള്‍, സുന്ദരദൃശ്യങ്ങള്‍ തുടങ്ങി നല്ലൊരു എന്റര്‍ടെയ്‌നറിനുവേണ്ട എല്ലാ ഘടകങ്ങളും ചിത്രത്തില്‍ ഒരുക്കിയിട്ടുണ്ട്. ഒരുപാട് രസകരമായ മുഹൂര്‍ത്തങ്ങള്‍ സമ്മാനിക്കുന്ന കാസനോവ നല്ലൊരു വിഷ്വല്‍ ട്രീറ്റാകുമെന്നാണ് എന്റെ വിശ്വാസം.''
ടി.എസ്. പ്രതീഷ്
കടപ്പാട്-ചിത്രഭൂമി
KERALITES - A moderated eGroup exclusively for Keralites...
To subscribe send a mail to Keralites-subscribe@yahoogroups.com.
Send your posts to Keralites@yahoogroups.com.
Send your suggestions to Keralites-owner@yahoogroups.com.
To unsubscribe send a mail to Keralites-unsubscribe@yahoogroups.com.
Homepage: www.keralites.net
No comments:
Post a Comment