വീട്ടമ്മയെ ബസില്‍ അപമാനിച്ച സംഭവം :പോലീസ്‌ വീഴ്‌ചയെപ്പറ്റി അന്വേഷിക്കാന്‍ ആഭ്യന്തരമന്ത്രി
തൊടുപുഴ: മദ്യപിച്ചെത്തിയ യുവാവ്‌കെ.എസ്‌.ആര്‍.ടി.സി ബസില്‍ യാത്രക്കാരിയെ അപമാനിക്കാന്‍ ശ്രമിച്ച വിവരം അറിയിച്ചിട്ടും ഫലപ്രദമായി ഇടപെടാതിരുന്ന പോലീസ്‌ നടപടിയെക്കുറിച്ച്‌ അന്വേഷിച്ച്‌ റിപ്പോര്‍ട്ട്‌ നല്‍കാന്‍ ആഭ്യന്തരമന്ത്രി തിരുവഞ്ചൂര്‍ രാധാകൃഷ്‌ണന്‍ മലപ്പുറം ജില്ലാ പോലീസ്‌ മേധാവിയോട്‌ നിര്‍ദേശിച്ചു. മംഗളം വാര്‍ത്തയെ തുടര്‍ന്നാണ്‌ മന്ത്രി ഇടപെട്ടത്‌.
അന്വേഷണം ആരംഭിച്ചതായി എസ്‌.പി മഞ്‌ജുനാഥ്‌ മംഗളത്തോട്‌ പറഞ്ഞു. ഇന്നലെ വാര്‍ത്ത പുറത്തുവന്നതോടെ തിരൂരങ്ങാടി പോലീസും സജീവമായി. രാവിലെതന്നെ പരാതിക്കാരിയെ വിളിച്ചു. പരാതിയുമായി മുന്നോട്ടുപോകാന്‍ തയ്യാറാണോയെന്നാണ്‌ തിരക്കിയത്‌.
പാലായില്‍നിന്ന്‌ സുല്‍ത്താന്‍ ബത്തേരിക്കു പോയ കെ.എല്‍. 15- 7420 നമ്പര്‍ സൂപ്പര്‍ഫാസ്‌റ്റ്‌ ബസിലാണ്‌ രണ്ട്‌ പെണ്‍മക്കള്‍ക്കും ഭര്‍ത്താവിനുമൊപ്പം യാത്രചെയ്യുകയായിരുന്ന വീട്ടമ്മ അപമാനിതയായത്‌. രാത്രി 8.10 ന്‌ മൂവാറ്റുപുഴയില്‍നിന്നു ബസില്‍ കയറിയ ഇവര്‍ സുല്‍ത്താന്‍ ബത്തേരിയിലേക്കു പോകുകയായിരുന്നു. തൃശൂരില്‍നിന്ന്‌ ബസില്‍ കയറിയ മദ്യലഹരിയിലായിരുന്ന യുവാവാണ്‌ അപമാനിക്കാന്‍ ശ്രമിച്ചത്‌.
വിവരമറിയിച്ചിട്ടും സ്‌ഥലത്തെത്താന്‍ പോലീസ്‌ വൈകിയതും തുടര്‍ നടപടിക്കു മടികാട്ടിയതും മംഗളം റിപ്പോര്‍ട്ടു ചെയ്‌തിരുന്നു. പോലീസിന്റെ അനാസ്‌ഥയ്‌ക്കെതിരേ വ്യാപകപ്രതിഷേധവും ഉയര്‍ന്നു. ഇതേതുടര്‍ന്നാണ്‌ സംഭവത്തെപ്പറ്റി അന്വേഷിച്ച്‌ റിപ്പോര്‍ട്ട്‌ നല്‍കാന്‍ ആഭ്യന്തരമന്ത്രി ആവശ്യപ്പെട്ടത്‌.
www.keralites.net          |
To subscribe send a mail to Keralites-subscribe@yahoogroups.com.
Send your posts to Keralites@yahoogroups.com.
Send your suggestions to Keralites-owner@yahoogroups.com.
To unsubscribe send a mail to Keralites-unsubscribe@yahoogroups.com.
Homepage: www.keralites.net
