ബൈപ്പാസിനു ശേഷവും കരുതൽ വേണം
Posted on: Monday, 07 January 2013
ബൈപ്പാസ് ശസ്ത്രക്രിയ്‌ക്കുശേഷം കുറഞ്ഞത് 10 ദിവസം ആശുപത്രിയിൽ കഴിയേണ്ടിവരും. ആശുപത്രിയിൽ നിന്ന് ഡിസ്ചാർജ് ചെയ്ത് വീട്ടിലെത്തിയതിനു ശേഷം ഏകദേശം ആറ് ആഴ്ചക്കാലം ചില നിയന്ത്രണങ്ങളും അതിനുശേഷം കരുതലോടെയുള്ള ജീവിത പുനഃക്രമീകരണവും അനിവാര്യമാണ്.
ശസ്ത്രക്രിയ ചെയ്ത നെഞ്ചിലെ മുറിവ് ഉണങ്ങുന്നതിനനുസരിച്ച് പ്രവർത്തിയിലും നിയന്ത്രണങ്ങളിലും പതിയെ ഇളവ് വരുത്തി ഏകദേശം മൂന്ന് മാസങ്ങൾക്കുശേഷം സാധാരണ ജീവിതം സാധ്യമാണ്. കൊഴുപ്പും ഉപ്പും കുറഞ്ഞതും പെട്ടെന്ന് ദഹിക്കുന്നതുമായ ഭക്ഷണം കഴിക്കാം. വയറുനിറച്ച് കഴിക്കരുത്. മലശോധന സുഗമമാക്കാൻ, നാരുകളടങ്ങിയ പഴങ്ങളും പച്ചക്കറികളും ഇലക്കറികളും ഉപയോഗിക്കുക.
ആശുപത്രിയിൽ ചെയ്തിരുന്ന വ്യയാമങ്ങൾ തുടരാം. രാവിലെയും വൈകിട്ടും വീടിനകത്ത് ആഹാരത്തിന് മുൻപ് 5-10 മിനിട്ട് നിരപ്പായ സ്ഥലത്ത് നടക്കണം. അടുത്ത ബന്ധുക്കളൊഴിച്ചുള്ള സന്ദർശകരെ ഒഴിവാക്കുന്നതാണ് നന്ന്. ദിവസവും രണ്ടുനേരം ശരീരം ഇളം ചൂടുള്ള വെള്ളമുപയോഗിച്ച് മറ്റൊരാളുടെ സഹായത്തോടെ കഴുകിതുടക്കാം.
കുനിയുകയും വളയുകയുമരുത്. ശുദ്ധ സംഗീതവും മനസിന് ആഹ്ലാദം പകരുന്ന ടി.വി പരിപാടികളും കുറച്ചുനേരം ആസ്വദിക്കാം. വർത്തമാനപത്രവും ചെറിയ പുസ്തകങ്ങളും വായിക്കാം. യൂറോപ്യൻ ക്ലോസറ്റുപയോഗിക്കുന്നതാണ് ഉത്തമം. മലബന്ധമുള്ളവർ മലശോധനയ്ക്കുള്ള മരുന്നുകളോ, ഫൈബർ സപ്ലിമെന്റുകളോ ഉപയോഗിക്കണം.
രണ്ടാമത്തെ ആഴ്ച
രാവിലെയും വൈകിട്ടും നടത്തം 10-15 മിനിട്ടാക്കാം. പതിയെ നടകയറാൻ ശ്രമിക്കാം. ഒരാളുടെ സഹായത്തോടെ ഒന്നിടവിട്ടുള്ള ദിവസങ്ങളിൽ കുളിക്കാം. സാവധാനം കുനിയുകയും നിവരുകയും ചെയ്തു നോക്കാം. ചെറിയ ജോലികൾ ചെയ്തുനോക്കാം. ഭക്ഷണക്രമീകരണവും ആശുപത്രിയിൽ നിന്ന് നിർദ്ദേശിച്ചിട്ടുള്ള വ്യായാമവും തുടരണം.
മൂന്നാമത്തെ ആഴ്ച
നടത്തം 15-20 മിനിട്ടാക്കി വർദ്ധിപ്പിക്കാം. രണ്ടാം നിലയിലേയ്ക്ക് പതിയെ കയറി നോക്കാം. മൂന്നു കിലോ വരെ ഭാരമുള്ള സാധനങ്ങൾ ഉയർത്താവുന്നതാണ്. ചെറിയ കപ്പിൽ വെള്ളമെടുത്തു തലയിൽ ഒഴിക്കാം. തലയും ശരീരവും തനിയെ കഴുകിതുടയ്‌ക്കാം. എന്നാൽ ടൗവ്വൽ തനിയെ പിഴഞ്ഞുമുറുക്കരുത്. ഒരാളുടെ സഹായത്തോടെ വീട്ടിനുപുറത്ത് കുറച്ചു യാത്ര ചെയ്തു തുടങ്ങാം. വലിയഭാരം ഉയർത്താൻ ശ്രമിക്കരുത്.
നാലാമത്തെ ആഴ്ച
ചെറിയ വീട്ടുജോലികൾ ചെയ്തു തുടങ്ങാം. നടത്തം 20-25 മിനിട്ടാക്കി വർദ്ധിപ്പിക്കണം. തനിയെ ദേഹം കഴുകി തുടയ്‌ക്കാം, കുളിയ്‌ക്കാം. നാലാഴ്ചയ്ക്കുശേഷം ഡോക്ടറെ കണ്ട് ദേഹപരിശോധന നടത്തണം. ബൈപ്പാസ് കഴിഞ്ഞ അഞ്ചുമുതൽ ആറാഴ്ച. പതിയെപ്പതിയെ സാധാരണ ജോലികൾ തുടങ്ങാം.
നടത്തം രാവിലെയും വൈകിട്ടും 30 മിനിട്ടാക്കി ഉയർത്താം. നിരപ്പായ തിരക്കില്ലാത്ത റോഡിൽ കുറച്ചുനേരം കാർഡ്രൈവ് ചെയ്തു നോക്കാം, തനിയെ ദിവസവും കുളിക്കാം. അധ്വാനം കുറഞ്ഞ കളികളിൽ ഏർപ്പെടാം. പതിയെപ്പതിയെ സാധാരണ ജീവിതത്തിലേയ്ക്ക് തിരിച്ചുവരാം.
ബൈപ്പാസ് ശസ്ത്രക്രിയ കഴിഞ്ഞ് ആറാഴ്ചകൾക്കുശേഷം, ഡോക്ടറുടെ ഉപദേശപ്രകാരം ആയാസ രഹിതമായ ലൈംഗികജീവിതം ആരംഭിക്കാം. മിക്ക രോഗികൾക്കും ആറ് ആഴ്ചകൾക്കുശേഷം കഠിനാധ്വാനം ആവശ്യമില്ലാത്ത ജോലികളിൽ പുനഃപ്രവേശിക്കാം.
No comments:
Post a Comment