കോട്ടയം: കേരളത്തിലെ എല്ലാ ദിനപ്പത്രങ്ങളെയും തകര്‍ത്ത് ഇനി ദേശാഭിമാനി മാത്രം മതി എന്ന നിലപാടുമായി സിപിഎം രംഗത്തെത്തിയതോടെ പത്ര വ്യവസായം തകര്‍ച്ചയിലായി. അനാവശ്യ സമരങ്ങള്‍ചെയ്ത് തങ്ങള്‍ പൂട്ടിച്ച കേരളത്തിലെ നൂറുകണക്കിനു സ്ഥാപനങ്ങളെപ്പോലെ പത്ര സ്ഥാപനങ്ങളെയും തകര്‍ക്കാനാണ് ആസൂത്രിത ശ്രമം നടക്കുന്നത്. കമ്മീഷന്‍ വര്‍ധിപ്പിച്ചു തരാമെന്ന മോഹന വാഗ്ദാനവുമായി ഏതാനും പത്ര ഏജന്റുമാരെ ചേര്‍ത്ത് സിഐടിയു യൂണിയന്‍ ഉണ്ടാക്കി കേരളത്തിലെ മുഖ്യധാരാ പത്രങ്ങളുടെയെല്ലാം വിതരണം തടഞ്ഞിരിക്കുകകയാണ് സിപിഎം.
യൂണിയിനില്‍ ചേരാതിരിക്കുകകയും സമരത്തില്‍ പങ്കെടുക്കാതിരിക്കുകയും ചെയ്യുന്ന ഏജന്റുമാരെ ഭീഷണിപ്പെടുത്തുക, മര്‍ദിക്കുക തുടങ്ങിയ സ്ഥിരം പരിപാടികളും പത്രക്കെട്ടുകള്‍ പിടിച്ചെടുത്ത് നശിപ്പിക്കുക ദേശാഭിമാനി ഒഴികെയുള്ള പത്രങ്ങള്‍ വരുത്തുന്ന വീട്ടുകാരെ ഭീഷണിപ്പെടുത്തുക തുടങ്ങിയ ആഭാസമാണ് കേരളത്തില്‍ ഇപ്പോള്‍ നടക്കുന്നത്. മലയാള മനോര, മാതൃഭൂമി, കേരള കൗമുദി, മാധ്യമം, ദി ഹിന്ദു, ടൈംസ് ഓഫ് ഇന്ത്യ തുടങ്ങിയ പ്രമുഖ പത്രങ്ങളുടെയെല്ലാ വിതരണം ദിവസങ്ങളായി മുടങ്ങിയിരിക്കുകകയാണ്. കമ്മീഷന്‍ വര്‍ധന നടപ്പാക്കുക, അധിക ജോലികള്‍ക്ക് ഓവര്‍ടൈം വ്യവസ്ഥയില്‍ വേതനം നടപ്പാക്കുക, പത്രം പ്രസിദ്ധീകരിക്കാത്ത അവധി ദിനങ്ങള്‍ വര്‍ധിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സിഐടിയു നേതൃത്വത്തില്‍ സമരം തുടങ്ങിയത്.
എന്നാല്‍ ഇന്ത്യയിലെ തന്നെ ഏറ്റവും കൂടുതല്‍ തുക കമ്മീഷനായി നല്‍കുന്ന മലയാള പത്രങ്ങള്‍ ഇനിയും കമ്മീഷന്‍ കൂട്ടിയാല്‍ സാമ്പത്തിക പ്രതിസന്ധിയിലാകുമെന്നതാണ് വസ്തുത. 18 മുതല്‍ 26 ശതമാനം വരെയാണ് നിലവില്‍ ഏജന്റുമാരുടെ കമ്മീഷന്‍. ഇത്ര അധികം തുക ഏജന്‍സി കമ്മീഷനായി നല്‍കുന്ന ബ്രാന്റഡ് ഉല്‍പന്നങ്ങള്‍ കേരളത്തില്‍ വേറെ ഉണ്ടോ എന്ന കാര്യം സംശയമാണ്. എന്നിട്ടും കമ്മീഷന്‍ വര്‍ധന ആവശ്യപ്പെടുന്നതിലെ അനൗചിത്യമാണ് പത്ര സ്ഥാപനങ്ങള്‍ ചൂണ്ടിക്കാണിക്കുന്നത്.
സമരക്കാരുടെ രണ്ടാമത്തെ ആവശ്യമായ അധിക ജോലിക്ക് ഓവര്‍ടൈം എന്നത് കേള്‍ക്കുമ്പോള്‍ ന്യായമാണെന്നു തോന്നാമെങ്കിലും ഇവര്‍ പറയുന്ന അധിക ജോലി എന്താണെന്നു കേള്‍ക്കുമ്പോളാണ് ആവശ്യത്തിലെ പൊള്ളത്തരം ബോധ്യപ്പെടുന്നത്. പത്രത്തോടൊപ്പം നല്‍കുന്ന സണ്‍ഡേ സപ്ലിമെന്റ്, വിദ്യാഭ്യാസം, തൊഴില്‍ വാര്‍ത്തകള്‍ തുടങ്ങിയ സപ്ലിമെന്റുകള്‍ വിതരണം ചെയ്യുന്നതിനാണ് ഓവര്‍ടൈം വേതനം ആവശ്യപ്പെടുന്നത്. കേരളത്തില്‍ പത്ര വ്യവസായം തുടങ്ങിയ നാള്‍മുതല്‍ പത്രത്തിന്റെ ഭാഗമാണ് ഇത്തരം സപ്ലിമെന്റുകള്‍. ഇത് എങ്ങനെ അധിക ജോലിയായി കണക്കാക്കാനാകും എന്നതാണ് പത്ര ഉടമകളുടെ ചോദ്യം.
മൂന്നാമത്തെ ആവശ്യമായ അവധി ദിന വര്‍ധന പത്ര സ്ഥാപനങ്ങളുടെ നേരെ മാത്രമല്ല മലയാളികളുടെ മുഴുവന്‍ നേരെയുള്ള വെല്ലുവിളിയാണ്. നിലവില്‍ ശരാശരി വര്‍ഷത്തില്‍ എട്ട് ദിവസമാണ് കേരളത്തില്‍ പത്രങ്ങള്‍ അവധിയെടുക്കാറുള്ളത്. ഈ ദിവസങ്ങളില്‍ വാര്‍ത്ത ലഭ്യമാകാത്തതുമൂലം ബുദ്ധിമുട്ടന്നവരാണ് മിക്ക മലയാളികളും. അപ്പോള്‍ പത്രമില്ലാത്ത ദിനങ്ങള്‍ വര്‍ധിപ്പിക്കുക എന്നതുകൊണ്ട് ഉദ്ദേശിക്കുന്നത് മലയാളികളുടെ അറിയാനുള്ള അവകാശത്തെ ധ്വംസിക്കുക എന്നതു തന്നെയാണ്.
No comments:
Post a Comment