1.ചര്‍മസംരക്ഷണം പ്രായത്തെ തോല്‍പ്പിക്കും
'ചര്‍മം കണ്ടാല്‍ പ്രായം തോന്നുകയേയില്ല' എന്നത് വര്‍ഷങ്ങളായി നമ്മള്‍ കേട്ടുകൊണ്ടിരിക്കുന്ന പരസ്യവാചകമാണ്. എന്നാല്‍ വെറും പരസ്യത്തിനപ്പുറം നമ്മുടെ ശരീരത്തിനെ സംബന്ധിച്ചുളള പരമമായ സത്യം കൂടിയാണിത്. ഓരോ മനുഷ്യനെയും യുവാവാക്കുന്നതും വയസനാക്കുന്നതും മുഖമോ, മുടിയോ ശരീരമോ ഒന്നുമല്ല, ചര്‍മമാണ്. ആ ചര്‍മം ബുദ്ധിപൂര്‍വം സംരക്ഷിച്ചാല്‍ പ്രായത്തെ തോല്‍പ്പിക്കാനാകുമെന്നതില്‍ സംശയമില്ല. നിങ്ങള്‍ എന്തുകഴിക്കുന്നു, എവിടെ പോകുന്നു, എങ്ങനെ ചിന്തിക്കുന്നു എന്നതെല്ലാം ചര്‍മത്തെ ബാധിക്കുന്ന കാര്യങ്ങളാണ്. ചര്‍മസംരക്ഷണത്തിനായി അത്യാവശ്യം ചെയ്യേണ്ട ചില കാര്യങ്ങള്‍ നോക്കാം.
2. കഴിക്കാം വിറ്റാമിനുകള്‍
ഇപ്പോഴിറങ്ങുന്ന മിക്ക സ്‌കീന്‍ ക്രീമുകളിലും വിറ്റാമിന്‍ 'സി'യോ 'ഇ'യോ അടങ്ങിയിട്ടുണ്ട്. പുറമേ പുരട്ടുന്നതിനുപകരം ഈ വിറ്റാമിനുകള്‍ അടങ്ങുന്ന പഴങ്ങളും പച്ചക്കറികളും കഴിച്ചാലോ? തിളങ്ങുന്ന ചര്‍മമായിരിക്കും പകരം കിട്ടുക. ചര്‍മം ചുക്കിച്ചുളിയുന്നത് ഒഴിവാക്കാനും ഈ വിറ്റാമിനുകള്‍ക്ക് സാധിക്കും. സെലീനിയം എന്ന ധാതു അടങ്ങുന്ന ഭക്ഷണം കഴിക്കുന്നതും ചര്‍മത്തിന് നല്ലതാണ്. മീന്‍, സുര്യകാന്തിക്കുരു, ഓട്‌സ്, ലിവര്‍ എന്നിവയിലെല്ലാം സെലീനിയം ധാരാളമായി ഉണ്ട്.
3. വ്യായാമം ചെയ്യാം
വ്യായാമം കൊണ്ട് മനുഷ്യശരീരത്തിനുണ്ടാകുന്ന ഗുണങ്ങളെ പറ്റി നമ്മള്‍ എത്രയോവട്ടം കേട്ടിട്ടുണ്ട്. ശരീരത്തിലെ ഏറ്റവും വലിയ അവയവമായ ചര്‍മത്തിനും വ്യായാമം കൊണ്ട് ഗുണമേയുള്ളൂ. ചര്‍മത്തിലെ രക്തചംക്രമണം വര്‍ധിപ്പിക്കാനും ദോഷകാരികളായ ടോക്‌സിനുകളെ കളയാനുമെല്ലാം വ്യായാമം സഹായിക്കുന്നു. രക്തയോട്ടം വര്‍ധിക്കുന്നതോടെ ചര്‍മത്തില്‍ കൂടുതല്‍ ഓക്‌സിജനും മറ്റു പോഷകമൂല്യങ്ങളുമെത്തുന്നു. ചുളിവുകളെ തടയുന്ന കൊളാജന്റെ ഉത്പാദനത്തിന് ഇത് സഹായകമാകുന്നു. പതിവായി വ്യായാമം ചെയ്യുമ്പോള്‍ ശരീരം വിയര്‍ക്കുന്നത് ചര്‍മത്തിന് ദോഷകരമല്ലേ എന്നു സംശയിക്കുന്നവരുണ്ട്. ചര്‍മത്തില്‍ അടഞ്ഞുകിടക്കുന്ന ദ്വാരങ്ങള്‍ തുറക്കാന്‍ സഹായിക്കുന്നതാണ് വിയര്‍പ്പ്. വ്യായാമത്തിനുശേഷം നന്നായൊന്നു കുളിച്ചാല്‍ വിയര്‍പ്പിന്റെ ശല്യം ഒഴിവാകുകയും ചെയ്യും.
4. ആരോഗ്യത്തിനായി ഉറങ്ങാം
ഒരാഴ്ച തുടര്‍ച്ചയായി ഉറക്കമൊഴിച്ചുനോക്കു, അക്കാര്യം നിങ്ങളുടെ ശരീരം കണ്ടാല്‍ അറിയാന്‍ സാധിക്കും. വിളര്‍ത്ത ചര്‍മം, കണ്ണിനുതാഴെ കറുത്ത പാടുകള്‍, ചത്ത കണ്ണുകള്‍... ഇവയെല്ലാം നിങ്ങള്‍ ശരിയായി ഉറങ്ങുന്നില്ലെന്ന കാര്യം ലോകത്തോടു വിളിച്ചുപറയും. ദിവസവും 7-8 മണിക്കുറെങ്കിലും ശരിയായി ഉറങ്ങുന്നത് ശരീരത്തിനും ചര്‍മവും നന്നായി നിലനിര്‍ത്താന്‍ ഉപകരിക്കും. എങ്ങനെ ഉറങ്ങുന്നുവെന്ന കാര്യവും പ്രധാനമാണ്. വര്‍ഷങ്ങളായി മുഖം തലയിണയില്‍ പൂഴ്ത്തിവച്ച് ഉറങ്ങുന്ന സ്വഭാവക്കാരനാണ് നിങ്ങളെങ്കില്‍ മുഖം ചുളിയുമെന്ന കാര്യത്തില്‍ സംശയം വേണ്ട. മലര്‍ന്നുകിടന്ന് ഉറങ്ങി ശീലിക്കുകയെന്നതാണ് ഇതിന്റെ പ്രതിവിധി.
5. പേടിക്കണം സൂര്യനെ
സൂര്യനെ ദൈവമായി ആരാധിക്കുന്നതില്‍ തെറ്റില്ല, പക്ഷേ സൂര്യപ്രകാശം പതിവായി കൊള്ളുന്നത് ചര്‍മത്തിന് അത്ര നല്ലതല്ലെന്ന് ആരോഗ്യവിദഗ്ധര്‍ മുന്നറിയിപ്പ് നല്‍കുന്നു. ചര്‍മത്തിനുണ്ടാകുന്ന തൊണ്ണൂറു ശതമാനം തകരാറുകളും സൂരപ്രകാശം സമ്മാനിക്കുന്നതാണ്. സ്‌കിന്‍ കാന്‍സറിനുള്ള സാധ്യതകളും ഇതു വര്‍ധിപ്പിക്കുന്നു. രാവിലെ പത്തുമണി മുതല്‍ രണ്ടുമണിവരെയുളള സൂര്യപ്രകാശത്തിനാണ് ഏറ്റവും ശക്തി. വെയിലത്തിറങ്ങുന്നതിനുമുമ്പ് സണ്‍സ്‌ക്രീന്‍ ലോഷന്‍ പതിവായി ഉപയോഗിക്കണം. വലിയ തൊപ്പികളോ ഫുള്‍ സ്ലീവ് വസ്ത്രങ്ങളോ ധരിക്കുന്നതും സുര്യപ്രകാശത്തില്‍ നിന്ന് ചര്‍മത്തെ സംരക്ഷിക്കും
6. കുറയ്ക്കണം, കുടി
മദ്യത്തിന്റെ അംശം വര്‍ധിക്കുന്നത് ശരീരത്തിനൊപ്പം ചര്‍മത്തിനും ഹാനികരമാണ്. ശരീരത്തിലെ വെള്ളം മുഴുവന്‍ ചോര്‍ത്തിക്കളയുന്ന പദാര്‍ഥമാണ് മദ്യം. വരണ്ട ചര്‍മമാകും ഇതിന്റെ ഫലം. രക്തക്കുഴലുകളുടെ വ്യാസം വര്‍ധിപ്പിക്കാനും ഇത് വഴിതെളിക്കുന്നു. മദ്യപാനികളുടെ മുഖം സദാ ചുവന്നുതുടുത്തിരിക്കുന്നത് ഇതുകൊണ്ടാണ്. കുടിയെപ്പോലെ ചര്‍മത്തിന് ഹാനികരമാണ് പുകവലിയും. സുര്യപ്രകാശത്തിനുശേഷം ചര്‍മത്തിന് ഏറ്റവും ദോഷം വരുത്തുന്ന കാര്യമാണിത്. ചര്‍മത്തിലേക്കുള്ള രക്തയോട്ടം കുറയ്ക്കുന്നു എന്നതാണ് പുകവലിയുടെ ഏറ്റവും മാരകദൂഷ്യം. രക്തയോട്ടം കുറയുന്നയോടെ കൊളാജെന്‍ ഉല്പാദനം കുറയുന്നു. കൊളാജെന്‍ കുറയുകയെന്നാല്‍ ചുളിവുകള്‍ കൂടുകയെന്നതാണ് ഫലം. പുകവലിക്കാരായ ഇരുപതുകാരന്റെ ചര്‍മം പോലും ചുക്കിച്ചുളിയുന്നത് ഇതുകൊണ്ടാണ്.
7. കഴുകിക്കളയാം മാലിന്യങ്ങളെ
ഓരോദിവസവും എന്തെന്ത് മാലിന്യങ്ങളെയാണ് ചര്‍മം നേരിടുന്നതെന്നറിയാമോ? സിഗരറ്റ് പുക, വാഹനങ്ങളില്‍ നിന്നുള്ള പുക, പൊടിക്കാറ്റ്. രാവിലെ മുതല്‍ നഗരത്തിലലയുന്ന ഒരാളുടെ ശരീരത്തില്‍ വൈകുന്നേരമാകുമ്പോഴേക്കും ഇവയെല്ലാം പൊതിയുമെന്ന കാര്യം ഉറപ്പ്. മൃദുവായ ഒരു സോപ്പുപയോഗിച്ച് മുഖവും ശരീരവും നന്നായി കഴുകുക എന്നതാണ് ഇതിനുള്ള പ്രതിവിധി. ചര്‍മം സംരക്ഷിക്കണമെന്ന് ആഗ്രഹിക്കുന്നുണ്ടെങ്കില്‍ ശരീരത്തിലെ മൃതകോശങ്ങളെ കഴുകിക്കഴഞ്ഞ് മോയിസ്ചറൈസര്‍ ശരീരമാസകലം പുരട്ടിയിട്ടുവേണം ഉറങ്ങാന്‍ പോകാന്‍.
8. വെള്ളം കുടിക്കാം, ധാരാളമായി
ശുദ്ധമായ കുടിവെള്ളം പോലെ നിങ്ങളുടെ ചര്‍മത്തെ സംരക്ഷിക്കുന്ന വസ്തു വേറെയില്ല. ധാരാളം വെള്ളം കുടിക്കുന്നത് ചര്‍മത്തിലെ ഈര്‍പ്പം നിലനിര്‍ത്താന്‍ സഹായിക്കുന്നു. അതുവഴി ചുളിവുകളെ ദൂരെനിര്‍ത്താന്‍ കഴിയും. ശരീരത്തിലെ കോശങ്ങള്‍ക്ക് വേണ്ട പോഷകങ്ങളെത്തിക്കാനും ടോക്‌സിനുകളെ പുറന്തള്ളാനുമൊക്കെ കുടിവെള്ളത്തിനു സാധിക്കു. വെള്ളം രക്തയോട്ടവും വര്‍ധിപ്പിക്കും, അതു നിങ്ങളുടെ ചര്‍മ്മത്തിന്റെ തിളക്കമേറ്റുകയും ചെയ്യും. ഒരുദിവസം എട്ടു മുതല്‍ പത്തു ഗഌസ് വെള്ളമെങ്കിലും കുടിച്ചാലേ ഇതൊക്കെ സാധ്യമാകൂ.
9. ഒഴിവാക്കാം, കറുത്തപാടുകള്‍
ഗര്‍ഭിണികളുടെയും ഗര്‍ഭനിരോധനഗുളികള്‍ കഴിക്കുന്ന സ്ത്രീകളുടെയും മുഖത്ത് കറുത്ത പാടുകള്‍ പ്രത്യക്ഷപ്പെടുന്നത് സാധാരണമാണ്. മെലാസ്മ എന്നാണിതിനു പേര്. ചര്‍മത്തിന് സ്വാഭാവികനിറം നല്‍കുന്ന മെലാനിന്‍ കൂടുന്നതുകൊണ്ടാണിത് സംഭവിക്കുന്നത്. പ്രസവത്തിനുശേഷവും ഗര്‍ഭനിരോധനഗുളികള്‍ കഴിക്കുന്നത് നിര്‍ത്തുമ്പോഴും മെലാസ്മയും ഇല്ലാതാകേണ്ടതാണ്. എന്നാല്‍ ചിലരിലെങ്കിലും അതു പിന്നെയും കണ്ടുവരാറുണ്ട്. അത്തരക്കാര്‍ നിര്‍ബന്ധമായും ഒരു സ്‌കിന്‍ ഡോക്ടറെ കണ്ട് ചികിത്സ തേടണം
10. തണുപ്പിലും വേനലിലും പ്രത്യേകശ്രദ്ധ
തണുത്ത കാലാവസ്ഥയും ശീതക്കാറ്റും ചര്‍മത്തോട് ചെയ്യുന്ന ദ്രോഹം ചില്ലറയല്ല. ചര്‍മമാകെ വലിഞ്ഞുപിടിക്കാനും മൊരി വര്‍ധിപ്പിക്കാനും തണുപ്പ് കാരണമാകുന്നു. പകല്‍ മുഴുവന്‍ മോയിസ്ചറൈസര്‍ തേയ്ക്കാന്‍ പ്രത്യേകമോര്‍ക്കണം. ധാരാളം വെള്ളം കുടിക്കുന്നതും നല്ലതാണ്.
കടുത്ത വേനലിലും ചര്‍മത്തിനു പ്രത്യേക ശ്രദ്ധ കൊടുക്കേണ്ടതുണ്ട്. പുറത്തിറങ്ങുന്നുണ്ടെങ്കില്‍ സണ്‍സ്‌ക്രീന്‍ ലോഷന്‍ നിര്‍ബന്ധമായും പുരട്ടണം. രണ്ടുമണിക്കൂര്‍ കൂടുമ്പോള്‍ ലോഷന്‍ വീണ്ടും പുരട്ടാന്‍ മറക്കരുത്.
11. കാപ്പിയും ചായയും വേണോ?
കാപ്പിയിലും ചായയിലും അടങ്ങിയിരിക്കുന്ന കഫീന്‍ ശരീരത്തിലെ ജലാംശമാകെ വലിച്ചെടുക്കുന്ന വസ്തുവാണ്. ദിവസവും കൂടുതല്‍ ചായയോ കാപ്പിയോ കുടിക്കുന്നയാളാണ് നിങ്ങളെങ്കില്‍ ചര്‍മം വരണ്ടുണങ്ങുമെന്ന കാര്യത്തില്‍ സംശയമില്ല. ചായക്കപ്പുപേക്ഷിച്ച് പച്ചവെള്ളം കുടിക്കുന്നതാകും ചര്‍മത്തിന് കൂടുതല്‍ ഗുണകരം.
12. ഭക്ഷണക്രമം പാലിക്കുക
ചര്‍മത്തെ പട്ടുപോലെ എന്നും നിലനിര്‍ത്താന്‍ ഈ പത്തു കാര്യങ്ങള്‍ കൃത്യമായി പാലിച്ചാല്‍ മതി. അതിനൊപ്പം ചിട്ടയായ ഭക്ഷണക്രമം കൂടി നിലനിര്‍ത്തിയാല്‍ കാര്യങ്ങള്‍ ഏറെ എളുപ്പമാകും. വിറ്റാമിന്‍ എ അടങ്ങുന്ന പഴങ്ങളും പച്ചക്കറികളും ധാരാളമായി കഴിക്കുകയെന്നതാണ് പ്രധാനമായും ചെയ്യേണ്ടത്. ഓറഞ്ചിലും കാരറ്റിലും മുട്ടയിലും ഇലക്കറികളിലൂമൊക്കെ വിറ്റാമിന്‍ എ ഇഷ്ടംപോലെയുണ്ട്. ചര്‍മത്തിലെ ചുളിവുകളെ ദുരെനിര്‍ത്താന്‍ വിറ്റാമിന്‍ എ സഹായിക്കും. പപ്പായ, നാരങ്ങ, കിവിപ്പഴം എന്നിവയിലടങ്ങിയിട്ടുള്ള വിറ്റാമിന്‍ സി, ഒലിവെണ്ണ, അണ്ടിപ്പരിപ്പ് എന്നിവയിലുളള വിറ്റാമിന്‍ ഇ എന്നിവയും ചര്‍മത്തിന് ഗുണം ചെയ്യുന്നവയാണ്. നമ്മുടെ നാടന്‍ മീന്‍ ഇനങ്ങളായ അയലയും മത്തിയും ധാരാളം കഴിക്കുന്നതും ചര്‍മത്തിനു നല്ലതുതന്നെ. ഇവയില്‍ ധാരാളമായി ഒമേഗ 3എസ്, ഒമേഗ 6എസ് ഫാറ്റി ആസിഡുകള്‍ അടങ്ങിയിട്ടുണ്ടെന്നതു തന്നെ കാരണം. ചര്‍മത്തില്‍ അദ്ഭുതകരമായ പ്രവര്‍ത്തനങ്ങള്‍ നടത്താന്‍ കഴിവുള്ള വസ്തുവാണ് ഗ്രീന്‍ ടീ അഥവാ പ്രകൃതിദത്തമായ തേയില. ആന്റിഓക്‌സിഡന്റുകളുടെ ഭണ്ഡാരമായാണ് ഗ്രീന്‍ ടീ അറിയപ്പെടുന്നത്. ശരീരത്തിലെ നീര്‍ക്കെട്ട് അകറ്റാനും ചര്‍മത്തെ സൂര്യാഘാതത്തില്‍ നിന്നു സംരക്ഷിക്കാനുമൊക്കെ ഗ്രീന്‍ ടീയ്ക്ക് സാധിക്കും. ഇപ്പോഴിറങ്ങുന്ന മിക്ക സൗന്ധര്യവര്‍ധക വസ്തുക്കളിലെയും പ്രധാന ചേരുവയാണ് ഗ്രീന്‍ ടീ. അതുകൊണ്ടു തന്നെ ഗ്രീന്‍ ടീ ദൈനംദിന ഡയറ്റിലുള്‍പ്പെടുത്തിയാല്‍ ഏറെ ഗുണകരമാകും.
കടപ്പാട് മാതൃഭൂമി .പി.എസ്. രാകേഷ്
www.keralites.net          |
To subscribe send a mail to Keralites-subscribe@yahoogroups.com.
Send your posts to Keralites@yahoogroups.com.
Send your suggestions to Keralites-owner@yahoogroups.com.
To unsubscribe send a mail to Keralites-unsubscribe@yahoogroups.com.
Homepage: www.keralites.net
No comments:
Post a Comment