[www.keralites.net] Current Affairs in Kerala

 

[News clips from DESHABHIMANI dated 5 July 2013]

സോളാര്‍ തട്ടിപ്പുകേസിലെ പ്രതി സരിത S നായരെ താന്‍ ഫോണില്‍ വിളിച്ചെന്ന വിവരം പുറത്തായതോടെ കലികയറിയ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ സരിതയെ വിളിച്ച മറ്റു മന്ത്രിമാരുടെയും കോണ്‍ഗ്രസ് നേതാക്കളുടെയും പേരുവിവരങ്ങള്‍ പുറത്തുവിട്ടു.

 

സരിതയെ വിളിച്ചവരുടെ പട്ടിക അന്വേഷണസംഘത്തില്‍നിന്ന് ശേഖരിച്ച് ഭരണാനുകൂല മാധ്യമങ്ങളുടെ പ്രതിനിധികള്‍ക്ക് മന്ത്രി കൈമാറുകയായിരുന്നു. ചില മാധ്യമപ്രതിനിധികളെ രഹസ്യമായി വിളിച്ചാണ് ആഭ്യന്തരമന്ത്രി പട്ടിക കൈമാറിയത്. ഐ ഗ്രൂപ്പ് മന്ത്രിമാരായ അടൂര്‍ പ്രകാശ്, കെ പി അനില്‍കുമാര്‍, ചില ഐ ഗ്രൂപ്പ് എംഎല്‍എമാര്‍ എന്നിവരുടെ പേരുകളാണ് പ്രധാനമായും പുറത്തുവിട്ടത്. കെപിസിസി പ്രസിഡന്റ് രമേശ് ചെന്നിത്തലയുടെ പേരും എ ഗ്രൂപ്പില്‍ തനിക്ക് ഭീഷണിയായി നില്‍ക്കുന്ന മന്ത്രി കെ സി ജോസഫ് ഉള്‍പ്പെടെയുള്ളവരുടെ പേരും മന്ത്രി മാധ്യമങ്ങള്‍ക്ക് നല്‍കി. കോള്‍ ലിസ്റ്റിനു പുറമെ ചില പ്രമുഖരുടെ പട്ടികയും പ്രത്യേകം തയ്യാറാക്കി നല്‍കി. ഇതും ചാനലുകള്‍ സംപ്രേഷണം ചെയ്തു.

 

സരിതയെ വിളിച്ചവരുടെ പേരുകള്‍ വ്യാഴാഴ്ച രാവിലെയാണ് കൂട്ടത്തോടെ പുറത്തുവിട്ടത്. തങ്ങളുടെ പേരുകള്‍ പുറത്തുവന്നതുകണ്ട് ഞെട്ടിയ മന്ത്രിമാരും കോണ്‍ഗ്രസ് എംഎല്‍എമാരും തിരുവഞ്ചൂരിനെതിരെ മുഖ്യമന്ത്രി ഉമ്മന്‍ചാണ്ടിയോടും കെപിസിസി പ്രസിഡന്റിനോടും പരാതിപ്പെട്ടു. ആഭ്യന്തരമന്ത്രിയുടെ ഓഫീസില്‍നിന്നല്ലാതെ വിവരങ്ങള്‍ പുറത്തുപോകില്ലെന്ന് അടൂര്‍ പ്രകാശും അനില്‍കുമാറും തറപ്പിച്ചു പറഞ്ഞു. സംഭവത്തെക്കുറിച്ച് അന്വേഷിക്കണമെന്നും ഇങ്ങനെ മുന്നോട്ടുപോകാനാകില്ലെന്നും മന്ത്രിമാര്‍ വ്യക്തമാക്കിയെന്നാണ് വിവരം.

 

കോണ്‍ഗ്രസില്‍ നേതൃമാറ്റ തര്‍ക്കം രൂക്ഷമായ ഘട്ടത്തില്‍ മുഖ്യമന്ത്രി പദത്തില്‍ തിരുവഞ്ചൂരിന് കണ്ണുണ്ടായിരുന്നു. ഉമ്മന്‍ചാണ്ടി മാറിയാല്‍ മുഖ്യമന്ത്രിക്കസേരയ്ക്ക് അവകാശമുന്നയിക്കാന്‍ തിരുവഞ്ചൂര്‍ കരുനീക്കി. മുഖ്യമന്ത്രി ഇതു മണത്തറിഞ്ഞു. അതിന്റെ തുടര്‍ച്ചയെന്നോണം മുഖ്യമന്ത്രിയുടെ ഓഫീസ് തിരുവഞ്ചൂരിനെ കുരുക്കാന്‍ ചില വിവരങ്ങള്‍ പുറത്തുവിട്ടു. താന്‍ സരിതയെ വിളിച്ച വിവരം മുഖ്യമന്ത്രിയുടെ ഓഫീസില്‍നിന്നാണ് പുറത്തുപോയതെന്നാണ് തിരുവഞ്ചൂരിന്റെ വിശ്വാസം.

 

നടി ശാലു മേനോനുമായുള്ള അടുത്തബന്ധം വിവാദമായതിനു പിന്നിലും മുഖ്യമന്ത്രിയുടെ ഓഫീസിനെയാണ് തിരുവഞ്ചൂര്‍ സംശയിക്കുന്നത്. ശാലുവും സരിതയുമായി തനിക്കുള്ള ബന്ധം മറച്ചുവയ്ക്കാന്‍ തിരുവഞ്ചൂര്‍ പാടുപെട്ടെങ്കിലും വിവരങ്ങള്‍ ഓരോന്നായി പുറത്തുവന്നു. ശാലു മേനോനെ ഒരു പരിചയവുമില്ലെന്ന ആഭ്യന്തരമന്ത്രിയുടെ വാദം പച്ചക്കള്ളമെന്ന് തെളിയിച്ചാണ് ശാലുവിന്റെ ഗൃഹപ്രവേശന ചടങ്ങില്‍ അദ്ദേഹം പങ്കെടുക്കുന്ന ചിത്രങ്ങള്‍ പുറത്തുവന്നത്.

 

ആഭ്യന്തര മന്ത്രി തിരുവഞ്ചൂര്‍ രാധാകൃഷ്ണനുമായി മാത്രമല്ല, മന്ത്രിമാരായ അടൂര്‍ പ്രകാശ്, എ പി അനില്‍കുമാര്‍, കെ സി ജോസഫ്, ഷിബു ബേബിജോണ്‍, ആര്യാടന്‍ മുഹമ്മദ്, എം കെ മുനീര്‍ എന്നിവരുമായി ഫോണില്‍ ബന്ധപ്പെട്ടുവെന്ന വിവരങ്ങളാണ് പുറത്ത് വന്നത്. ഇതില്‍ ആര്യാടനും മുനീറും സരിതയുമായി ഫോണില്‍ സംസാരിച്ചുവെന്ന് നേരത്തെ സമ്മതിച്ചിരുന്നു. ഫോണ്‍ വിളിച്ച കാര്യം അതീവ രഹസ്യമാക്കി വെച്ചവരുടെ പേരുകളാണ് ഇപ്പോള്‍ പുറത്ത് വന്നുകാണ്ടിരിക്കുന്നത്.

 

സൗരോര്‍ജ പാനലിന്റെ പേരില്‍ ഭരണ സ്വാധീനമുപയോഗിച്ച് സംസ്ഥാന ഖജനാവില്‍ നിന്നും കോടികള്‍ കൊള്ളയടിക്കാനുള്ള ഗൂഢാലോചനയാണ് നടന്നതെന്നാണ് ഫോണ്‍വിളികളുടെ വിശദാംശങ്ങള്‍ വെളിപ്പെടുത്തുന്നത്. കേവലം സ്ത്രീ വീഷയമായി ഒതുക്കാന്‍ കഴിയാത്ത വിധമാണ് വിവരങ്ങള്‍ പുറത്തുവരുന്നത്. നിഗൂഢമായ സാമ്പത്തിക ഇടപാടുകളാണ് സരിതയും സംഘവും നടത്തുന്നത്. ഇതിനുള്ള സഹായം നല്‍കിയെന്നാണ് മുഖ്യമന്ത്രിയുടേയും മന്ത്രിമാരുടേയും ഫോണ്‍വിളികളുടെ വിശദാംശങ്ങള്‍ വെളിപ്പെടുത്തുന്നത്.

 

സ്വന്തമായി മൊബൈല്‍ ഫോണില്ലാത്ത മുഖ്യമന്ത്രി ഉമ്മന്‍ചാണ്ടി വിശ്വസ്തരായ പഴ്സണല്‍ സ്റ്റാഫ് അംഗങ്ങളുടേയും ഗണ്‍മാന്‍മാരുടേയും ഫോണിലാണ് വിളിച്ചത്.

 

ഇതിനു പിന്നാലെ തിരുവഞ്ചൂരിന്റെ ഊഴമായി. ഇപ്പോള്‍ മറ്റ് മന്ത്രിമാരും നേതാക്കളും കൂട്ടത്തോടെ സരിതയെ വിളിച്ച വിവരം പുറത്തുവരുന്നു. തിരുവഞ്ചൂര്‍ രാധാകൃഷ്ണന്‍ കേസിന്റെ നിര്‍ണായക സമയത്താണ് സരിതയെ വിളിച്ചത്.

 

പ്രൈവറ്റ് സെക്രട്ടറി വി കെ രവീന്ദ്രന്റെ പേരിലുള്ള ഫോണില്‍ നിന്നും ഫെബ്രുവരി 23നും മെയ് 23നുമിടയില്‍ 30 തവണയാണ് പരസ്പരം വിളിച്ചത്. സരിതയുടെ അറസ്റ്റ് നടക്കുന്ന ജൂണ്‍ മൂന്നിന് തലേന്നും വിളിച്ചു. ഇതില്‍ ഒമ്പത് തവണയും സരിതയെ അങ്ങോട്ട് വിളിച്ചതാണ്.

 

മന്ത്രി എ പി അനില്‍കുമാര്‍ നാല് തവണ വിളിച്ചതിന്റെ വിവരങ്ങളാണ് പുറത്ത് വന്നത്. മന്ത്രിയുടെ അഡീഷണല്‍ പ്രൈവറ്റ് സെക്രട്ടറി പി നസറുള്ള 20 തവണ വിളിച്ചു. ഇതില്‍ 10 തവണ സരിതയെ വിളിച്ചതാണ്. ഓരോ കോളും 400 സെക്കന്‍ഡ് മുതല്‍ 650 സെക്കന്‍ഡ് വരെ നീണ്ടു. പരിപാടിയില്‍ പങ്കെടുക്കാന്‍ തന്നെ വിളിച്ചതാണെന്നാണ് അനില്‍കുമാറിന്റെ ന്യായം.

 

റവന്യു മന്ത്രി അടൂര്‍ പ്രകാശും സരിതയുമായി പലവട്ടം ഫോണില്‍ സംസാരിച്ചു. തന്റെ മണ്ഡലത്തിലെ ഒരു റിട്ടയേര്‍ഡ് അധ്യാപികയുടെ പണം തട്ടിയെടുത്ത കേസിലാണ് സരിതയെ ബന്ധപ്പെട്ടതെന്നാണ് അടൂര്‍ പ്രകാശ് പറയുന്നത്. സരിത തട്ടിപ്പുകാരിയാണെന്ന് മന്ത്രിക്ക് അറിയാമായിരുന്നുവെന്ന് ഈ വെളിപ്പെടുത്തല്‍ വ്യക്തമാക്കുന്നു.

 

ഗണേഷ്കുമാര്‍ സ്വന്തം ഫോണില്‍ നിന്നും ഗണ്‍മാന്‍മാരുടെ ഫോണില്‍ നിന്നും വിളിച്ചതിന്റെ എണ്ണം തിട്ടപ്പെടുത്താന്‍ കഴിയുന്നതിലും കൂടുതലാണ്.

 

മോന്‍സ് ജോസഫ് എംഎല്‍എ 107 തവണ വിളിച്ചതിന്റെ രേഖകള്‍ പുറത്ത് വന്നു. ഇതില്‍ ഒട്ടുമിക്കതും രാത്രി 11 മണിക്ക് ശേഷമാണ്.

 

ഹൈബി ഈഡന്‍ 17 തവണ വിളിച്ചു.

 

പി സി വിഷ്ണുനാഥ്, ബെന്നിബെഹന്നാന്‍, ടി സിദ്ദിഖ് തുടങ്ങി മുഖ്യമന്ത്രിയുടെ വലംകൈകളായി അറിയപ്പെടുന്നവരുമായി സരിത സജീവബന്ധം പുലര്‍ത്തി.

 

കെപിസിസി പ്രസിഡന്റ് രമേശ് ചെന്നിത്തലയെ സരിത വിളിച്ചതിന്റെ വിശദാംശങ്ങളും തിരുവഞ്ചൂറിന്റെ ഓഫീസ് പുറത്ത് വിട്ട രേഖകളിലുണ്ട്. എന്നാല്‍ താന്‍ ആരേയും വിളിച്ചില്ലെന്നും കെപിസിസി പ്രസിഡന്റ് എന്ന നിലയില്‍ തന്നെ ആരൊക്കെ വിളിച്ചുവെന്ന കാര്യം ഓര്‍ക്കുന്നില്ലെന്നും ചെന്നിത്തല പ്രതികരിച്ചു.

 

എ പി അബ്ദുള്ള കുട്ടി, മന്ത്രി പി കെ ജയലക്ഷ്മി, ഷാനിമോള്‍ ഉസ്മാന്‍, ലതിക സുഭാഷ് എന്നിവരെ സരിത വിളിച്ചതും പുറത്ത് വന്നു.

 

*****************************************************************

 

സോളാര്‍ തട്ടിപ്പ് കേസിലെ മുഖ്യപ്രതി സരിതയെ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ വിളിച്ചത് അറസ്റ്റ് ചെയ്യാന്‍ പൊലീസ് യാത്രതിരിച്ചതിനു തൊട്ടു പിന്നാലെയെന്ന് വ്യക്തമായി. കണ്ണൂര്‍ ജില്ലയിലെ ഡോക്ടര്‍മാരെ കൂട്ടത്തോടെ കബളിപ്പിച്ച കേസില്‍ സരിതയെ അറസ്റ്റ് ചെയ്യാന്‍ മെയ് 23ന് കാലത്ത് 10.30നാണ് എസ്ഐ ബിജുജോണും രണ്ട് പൊലീസുകാരും തലശ്ശേരിയില്‍ നിന്നും പുറപ്പെട്ടത്. 11 മണിക്ക് തിരുവഞ്ചൂര്‍ സരിതയെ വിളിച്ചു. മന്ത്രിയുമായി കൂടിയാലോചിച്ച് നിമിഷങ്ങള്‍ക്കകം സരിത പെരുമ്പാവൂരില്‍ നിന്ന് മുങ്ങി.

 

 

ഡോക്ടര്‍മാരുടെ പരാതിയില്‍ തുടര്‍നടപടിക്കായി മേലുദ്യോഗസ്ഥരുടെ സമ്മതം വാങ്ങിയ ശേഷമാണ് ബിജുജോണും സംഘവും പുറപ്പെട്ടത്. ഇക്കാര്യം തലശ്ശേരി എസ്പി നീരജ്കുമാര്‍ ഗുപ്തയേയും കണ്ണൂര്‍ ഡിവൈഎസ്പി പി സുകുമാരനേയും അറിയിച്ചിരുന്നു. ഉടന്‍ തന്നെ കണ്ണൂര്‍ ഡിവൈഎസ്പി സുകുമാരന്‍ ആഭ്യന്തര മന്ത്രിയുമായി ബന്ധപ്പെട്ടെന്നാണ് വിവരം. തൊട്ടുപിന്നാലെ തിരുവഞ്ചൂര്‍ സരിതയെ വിളിച്ചു. ഇതിനു പുറമെ തിരുവഞ്ചൂരിന്റെ പ്രൈവറ്റ് സെക്രട്ടറി വി കെ രവീന്ദ്രന്റെ ഫോണില്‍ സരിതയുമായി തുടര്‍ച്ചയായി സംസാരിച്ചിട്ടുണ്ട്. ചുരുങ്ങിയ കാലയളവിനുള്ളില്‍ മുപ്പതോളം തവണ സംസാരിച്ചു. സരിതയെ അറസ്റ്റ് ചെയ്യുന്നത് ജൂണ്‍ മൂന്നിനാണ്. മെയ് 30നും പ്രൈവറ്റ് സെക്രട്ടറിയുടെ ഫോണില്‍ സരിതയുമായി കൂടിയാലോചന നടന്നിട്ടുണ്ട്.

 

 

 

സരിതയെ അറസ്റ്റ് ചെയ്യാന്‍ തീരുമാനിച്ച ബിജുജോണിനേയും രണ്ട് പൊലീസുകാരേയും ദിവസങ്ങള്‍ക്കകം തിരുവഞ്ചൂര്‍ ഇടപെട്ട് സ്ഥലം മാറ്റി.

 

ബിജുജോണും സംഘവും അറസ്റ്റിന് പുറപ്പെട്ടതോടെയാണ് സരിതയ്ക്കെതിരായ മറ്റ് കേസുകള്‍ക്കും പെട്ടെന്ന് ജീവന്‍ വെച്ചതെന്നാണ് തിരുവഞ്ചൂരിന്റെ വിശ്വാസം. ഇതിന് പ്രതികാരമായാണ് സ്ഥലംമാറ്റം.

 

സരിതയ്ക്ക് വേണ്ടി ഡോക്ടര്‍മാരുമായി മധ്യസ്ഥ ചര്‍ച്ച നടത്തിയതും കേസ് ഒതുക്കാന്‍ ശ്രമിച്ചതും ഡിവൈഎസ്പി സുകുമാരനാണ്. തിരുവഞ്ചൂര്‍ രാധാകൃഷ്ണന്റെ വിശ്വസ്തനായ സുകുമാരന്റെ കണ്ണൂര്‍ ജില്ലയിലെ ക്രിമിനല്‍ ബന്ധവും കുപ്രസിദ്ധമാണ്.

 

മെയ് 23ന് മന്ത്രിയുടെ അറിവോടെ മുങ്ങിയ സരിതയെ 10 ദിവസത്തിന് ശേഷമാണ് അറസ്റ്റ് ചെയ്തത്. കോടതി വാറന്റ് പുറപ്പെടുവിച്ച സാഹചര്യത്തില്‍ അറസ്റ്റ് ചെയ്യാന്‍ പൊലീസ് നിര്‍ബന്ധിതരാകുകയായിരുന്നു. തട്ടിപ്പിനിരയായ പെരുമ്പാവൂര്‍ സ്വദേശിയുടെ പരാതിയിലായിരുന്നു അറസ്റ്റ്.

 

വെറും 19 സെക്കന്‍ഡ് മാത്രമാണ് സംഭാഷണ ദൈര്‍ഘ്യം എന്നാണ് തിരുവഞ്ചൂര്‍ ഇപ്പോള്‍ അവകാശപ്പെടുന്നത്. അറസ്റ്റിന് പൊലീസ് പുറപ്പെട്ട വിവരം അറിയിക്കാന്‍ ഇതുതന്നെ ധാരാളം.

 

 

തന്നെ വിളിച്ചതാണെന്നും താന്‍ അങ്ങോട്ട് വിളിച്ചിട്ടില്ലെന്നും പറഞ്ഞുകൊണ്ടിരുന്ന തിരുവഞ്ചൂര്‍ ഒടുവില്‍ താനും വിളിച്ചെന്ന് സമ്മതിച്ചു. മിസ്ഡ് കോള്‍ കണ്ട് തിരിച്ചുവിളിച്ചതാണെന്ന മന്ത്രിയുടെ വാദം പരിഹാസ്യമായി. തലസ്ഥാനത്തെ മാധ്യമപ്രവര്‍ത്തകര്‍ ഉള്‍പ്പെടെ പലരും മന്ത്രിയെ വിളിക്കാറുണ്ടെങ്കിലും തിരിച്ചുവിളിക്കുന്ന പതിവില്ല. താന്‍ വിളിച്ചാല്‍ പോലും മന്ത്രി തിരിച്ചുവിളിക്കാറില്ലെന്നാണ് എംഎല്‍എയും മുന്‍ കെപിസിസി പ്രസിഡന്റും കൂടിയായ കെ മുരളീധരന്‍ തുറന്നടിച്ചത്.

 

 

സോളാര്‍ തട്ടിപ്പ് കേസിലെ മുഖ്യപ്രതി സരിത എസ് നായര്‍ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്റെ കോട്ടയത്തെ വീട്ടിലെത്തി രണ്ടു മണിക്കൂറോളം സംസാരിച്ചതായി ഡ്രൈവര്‍ ശ്രീജിത്ത് വെളിപ്പെടുത്തി.

 

സരിത കെഎല്‍07 ബിക്യു 8593 നമ്പരിലുള്ള ഐ- 20 കാറില്‍ രാവിലെ പത്തിനാണ് തിരുവഞ്ചൂരിനെ കാണാനെത്തിയത്. തിരുവഞ്ചൂരിന്റെ പ്രൈവറ്റ് സെക്രട്ടറി വി കെ രവീന്ദ്രനെയും വീട്ടിലെത്തി സരിത കണ്ടു. രണ്ടരമാസം മുമ്പാണ് തിരുവഞ്ചൂരിന്റെ വീട്ടില്‍ സരിതയെത്തിയത്. രണ്ടുമണിക്കൂറോളം സംസാരം തുടര്‍ന്നു. അറസ്റ്റ് നടക്കുന്നതിന് ഒന്നരമാസം മുമ്പാണ് പ്രൈവറ്റ് സെക്രട്ടറിയുടെ തിരുവനന്തപുരത്തുള്ള വീട്ടില്‍ സരിത എത്തിയതെന്നും ശ്രീജിത്ത് "ദേശാഭിമാനി"യോട് പറഞ്ഞു.

 

ഇതിനിടെ, ശാലു മേനോന്റെ വീട് നിര്‍മാണത്തിന് ബിജു രാധാകൃഷ്ണന്‍ പണം നല്‍കുന്നുണ്ടെന്ന് സരിതയുടെ അമ്മ ഇന്ദിര സോമരാജന്‍ പറഞ്ഞതായി പ്രവാസി മലയാളിയും സോളാര്‍ ഇടപാടില്‍ 1.19 കോടി രൂപ നഷ്ടപ്പെട്ട വ്യക്തിയുമായ ഇടയാറന്മുള കോട്ടയ്ക്കകത്ത് ബാബുരാജ് പറഞ്ഞു.

 

 

*******************************************************

 

സോളാര്‍ തട്ടിപ്പുകേസില്‍ മുഖ്യമന്ത്രിയുടെയും ആഭ്യന്തരമന്ത്രിയുടെയും പങ്ക് അന്വേഷിക്കണമെന്ന് ആവശ്യപ്പെട്ടുള്ള ഹര്‍ജിയില്‍ കോടതി നേരിട്ട് തെളിവെടുക്കും. ഉമ്മന്‍ചാണ്ടിക്കും തിരുവഞ്ചൂരിനുമെതിരെ വ്യക്തമായ തെളിവുണ്ടായിട്ടും നടപടിയെടുത്തില്ലെന്നു കാണിച്ച് വലിയതുറ സ്വദേശി സെബാസ്റ്റ്യന്‍ ടോംസ് സമര്‍പ്പിച്ച ഹര്‍ജിയുടെ അടിസ്ഥാനത്തിലാണ് തിരുവനന്തപുരം ജുഡീഷ്യല്‍ ഒന്നാംക്ലാസ് മജിസ്ട്രേട്ട് കോടതി (രണ്ട്) നേരിട്ട് തെളിവെടുക്കാന്‍ തീരുമാനിച്ചത്.

 

 

എറണാകുളം ഗസ്റ്റ് ഹൗസില്‍ ബിജു രാധാകൃഷ്ണനും ഉമ്മന്‍ചാണ്ടിയും മുക്കാല്‍മണിക്കൂറോളം കൂടിക്കാഴ്ച നടത്തിയതായി ഹര്‍ജിയില്‍ പറഞ്ഞു. ബിജുവുമായുള്ള മുഖ്യമന്ത്രിയുടെ അടുപ്പമാണ് ഇത് കാണിക്കുന്നത്.

 

2012ലും 2013 മേയിലും സരിത എസ് നായര്‍, ബിജു രാധാകൃഷ്ണന്‍, ശാലുമേനോന്‍ എന്നിവര്‍ ഉമ്മന്‍ചാണ്ടിയുടെ ഔദ്യോഗികവസതി പലതവണ സന്ദര്‍ശിച്ചിട്ടുണ്ട്.

 

ഉമ്മന്‍ചാണ്ടിയുടെ അറിവോടെയും സമ്മതത്തോടെയുമാണ് ബിജു രാധാകൃഷ്ണന്‍ മുഖ്യമന്ത്രിയുടെ ലെറ്റര്‍പാഡ് ഉപയോഗിച്ച് തട്ടിപ്പ് നടത്തിയത്്. ഇവര്‍ക്കെതിരെയുള്ള തെളിവുകള്‍ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ നേരിട്ട് ഇടപെട്ടാണ് നശിപ്പിച്ചത്. സരിത നായര്‍ 2013 ജനുവരി 23ന് വൈകിട്ട് 6.11നും 24ന് പകല്‍ 1.30നും വൈകിട്ട് 3.15നുമിടയിലും 28ന് വൈകിട്ട് 5.23നും തിരുവഞ്ചൂരിനെ ഫോണില്‍ ബന്ധപ്പെട്ടതിന് തെളിവുകളുണ്ട്.

 

തട്ടിപ്പിന്റെ വിഹിതം മുഖ്യമന്ത്രിക്കും ആഭ്യന്തരമന്ത്രിക്കും ലഭിച്ചിട്ടുണ്ടോ എന്ന് ശാസ്ത്രീയമായി അന്വേഷിച്ചാല്‍മാത്രമേ അറിയാന്‍പറ്റൂ. അതിനാല്‍ വിശദമായ അന്വേഷണം നടത്തണമെന്നും ഹര്‍ജിയില്‍ ആവശ്യപ്പെട്ടു.

 

 

 

സരിത എസ് നായര്‍, ബിജു രാധാകൃഷ്ണന്‍, ടെന്നി ജോപ്പന്‍, ജിക്കുമോന്‍, സലിംരാജ്, അശോകന്‍, രവീന്ദ്രന്‍പിള്ള, ശാലുമേനോന്‍ എന്നിവരെയും ഹര്‍ജിയില്‍ പ്രതിയാക്കിയിട്ടുണ്ട്. മുഖ്യമന്ത്രിയും ആഭ്യന്തരമന്ത്രിയും മറ്റു പ്രതികളുമായി ഗൂഢാലോചന നടത്തിയതിന്റെ ഭാഗമായാണ് തട്ടിപ്പെന്നും ഹര്‍ജിയില്‍ പറഞ്ഞു.

 

കബളിപ്പിക്കല്‍, കുറ്റകരമായ ഗൂഢാലോചന, വ്യാജരേഖ ചമയ്ക്കല്‍ എന്നീ വകുപ്പുകള്‍പ്രകാരം പ്രതികള്‍ക്കെതിരെ കേസെടുക്കണമെന്നാണ് ആവശ്യം. തട്ടിപ്പിനിരയായ ശ്രീധരന്‍നായര്‍, റാഫിഖ് അലി, സണ്ണി ജേക്കബ് എന്നിവരെയും സൈബര്‍സെല്‍ ഡിവൈഎസ്പിയെയും സാക്ഷിയാക്കിയിട്ടുണ്ട്.

 

പ്രതികളുടെ മൊബൈല്‍, ലാന്‍ഡ് ഫോണുകളിലെ കോളുകളുടെ വിവരം എടുക്കണമെന്നും ഹര്‍ജിയില്‍ ആവശ്യപ്പെട്ടു. അഡ്വ. സാന്‍ടി ജോര്‍ജ് മുഖേനയാണ് ഹര്‍ജി നല്‍കിയത്. ഹര്‍ജി ഫയലില്‍ സ്വീകരിച്ച കോടതി, വാദിയുടെ മൊഴിയെടുക്കാനായി കേസ് ഇരുപതിലേക്ക് മാറ്റി

---

www.keralites.net

__._,_.___

Reply to sender | Reply to group | Reply via web post | Start a New Topic

Messages in this topic (2)

Recent Activity:

• New Members 42

Visit Your Group

KERALITES - A moderated eGroup exclusively for Keralites...
To subscribe send a mail to Keralites-subscribe@yahoogroups.com.
Send your posts to Keralites@yahoogroups.com.
Send your suggestions to Keralites-owner@yahoogroups.com.

To unsubscribe send a mail to Keralites-unsubscribe@yahoogroups.com.

Homepage: www.keralites.net

Switch to: Text-Only, Daily Digest • Unsubscribe • Terms of Use

.

__,_._,___